پاک فوج کے خلاف پروپیگنڈا

مارچ 2026 میں سوشل میڈیا پر ایک پرانی ویڈیو گردش میں لائی گئی جس میں دعویٰ کیا گیا کہ خیبر کے جمرود ضلع میں دہشت گردوں نے لیزر گائیڈڈ ہتھیار سے فرنٹیئر کور کے پوسٹ پر حملہ کیا۔ ویڈیو کو "حملے کی فوٹیج" کا لیبل دے کر شیئر کیا گیا تاکہ پاکستان کی فوجی طاقت اور علاقائی سیکورٹی پر شکوک پیدا کیے جا سکیں۔
اصل حقائق: یہ ویڈیو 2019 میں امریکہ کے پینٹاگون نے ابوبکر البغدادی کے کمپاؤنڈ (شام) پر کیے گئے چھاپے کی فوٹیج کے طور پر جاری کی تھی۔ ویڈیو میں امریکی فورسز کی کارروائی دکھائی گئی تھی۔ جمرود علاقہ مکمل طور پر محفوظ ہے اور اس علاقے میں کوئی ایسا حملہ نہیں ہوا۔ یہ ویڈیو جعلی بیانیہ پھیلانے کے لیے ری سائیکل کی جا رہی ہے۔

مارچ 2026 میں سوشل میڈیا پر ایک پرانی ویڈیو گردش میں لائی گئی جس میں دعویٰ کیا گیا کہ پاکستانی فوجی قبائلی علاقوں میں نابالغ پشتون بچوں کو لائن میں کھڑا کر کے قریب سے گولی مار رہے ہیں۔ پوسٹ میں ویڈیو کو "disturbing" قرار دیا گیا اور لوگوں کو غصہ دلانے کی کوشش کی گئی۔
اصل حقائق: یہ ویڈیو 2010 میں سوات میں دہشت گردی کے خلاف آپریشن کے دوران پاکستان آرمی کو بدنام کرنے کے لیے سٹیجڈ کی گئی تھی۔ پاکستان آرمی کے ترجمان میجر جنرل اطہر عباس نے اسے اسی وقت جعلی قرار دیا تھا۔ بعد میں بھی ویڈیو کے سچ ہونے کا کوئی ثبوت نہیں ملا۔ ویڈیو میں دکھایا گیا منظر حقیقی نہیں بلکہ پروپیگنڈا تھا جو آج بھی فوج مخالف عناصر دوبارہ استعمال کر رہے ہیں

فروری 2025 میں فیلڈ مارشل عاصم منیر کے دورہ برطانیہ کے دوران سوشل میڈیا پر ایک ویڈیو وائرل ہوئی جس میں ایک بڑے ہجوم کو پاکستان تحریک انصاف کے جھنڈے اٹھائے مارچ کرتے ہوئے دکھایا گیا۔ اس ویڈیو کے ساتھ یہ دعویٰ کیا گیا کہ یہ لندن میں آرمی چیف کے خلاف ہونے والا احتجاج ہے اور بیرون ملک پاکستانی ان کے دورے کے خلاف مظاہرہ کر رہے ہیں۔
تاہم تحقیقات سے یہ دعویٰ غلط ثابت ہوا۔ AFP Fact Check کے مطابق یہ ویڈیو دراصل لندن کی نہیں بلکہ Brescia میں نومبر 2024 میں ہونے والے ایک احتجاج کی تھی، جہاں پی ٹی آئی کے حامیوں نے عمران خان کی حمایت میں مظاہرہ کیا تھا۔
یہی ویڈیو پہلے ہی نومبر 2024 میں سوشل میڈیا پر اپلوڈ ہو چکی تھی، یعنی اس کا فروری 2025 کے واقعے سے کوئی تعلق نہیں تھا۔ اس کے علاوہ Google Street View کے ذریعے ویڈیو میں موجود مقام کی نشاندہی بھی اٹلی کے شہر بریشیا سے ہوئی، جس سے اس دعوے کی مزید تردید ہو گئی۔

افغان میڈیا کو دیے گئے ایک انٹرویو میں خود کو ’’کیپٹن عمران علی‘‘ کہنے والے شخص نے دعویٰ کیا کہ وہ پاک فوج میں کمپنی کمانڈر تھا اور 26 نومبر 2024 کو اسے عوام پر براہِ راست فائرنگ کا حکم دیا گیا، جسے اس نے ماننے سے انکار کر دیا۔ اس کے مطابق اسی انکار پر اسے گرفتار کر کے غداری کے مقدمات میں نامزد کیا گیا۔ تاہم دستیاب پولیس ریکارڈ اور زمینی حقائق اس دعوے کی نفی کرتے ہیں۔ شانگلہ پولیس کے مطابق عمران علی کو 16 ستمبر 2024 کو جعلی فوجی شناخت، نوسربازی اور غیر قانونی اسلحہ رکھنے کے الزام میں گرفتار کیا گیا تھا۔ تلاشی کے دوران جعلی آرمی کارڈ، وردی میں تصاویر، متعدد سمز، بینک چیکس اور اسلحہ برآمد ہوا۔ مقامی افراد کے مطابق وہ ماضی میں بھی خود کو فوجی افسر ظاہر کر کے لوگوں کو دھوکہ دیتا رہا ہے۔ ضمانت کے بعد وہ غیر قانونی طور پر انگلینڈ جا کر خود کو سیاسی مظلوم ظاہر کر رہا ہے۔

پی ٹی آئی سے وابستہ کئی بڑے سوشل میڈیا اکاؤنٹس، جن میں سبی کاظمی جیسے نام بھی شامل تھے، نے پی آئی اے کی نجکاری کے معاملے پر یہ جھوٹ پھیلایا کہ اس کے ساتھ نیویارک کا روزویلٹ ہوٹل بھی فروخت کر دیا گیا ہے، جس کی مبینہ مالیت ڈیڑھ سے ڈھائی ارب ڈالر بتائی گئی۔ اس دعوے کو بنیاد بنا کر شہباز شریف حکومت اور فوج کو ایک ہی صفحے پر رکھ کر اداروں کے خلاف شدید مہم چلائی گئی۔

تاہم پی آئی اے کی نجکاری سے متعلق کسی بھی سرکاری معاہدے، دستاویز یا شرائط میں روزویلٹ ہوٹل کی فروخت یا اس کے شامل ہونے کا کوئی ذکر موجود نہیں تھا۔ روزویلٹ ہوٹل نہ تو بیچا گیا اور نہ ہی نجکاری پیکج کا حصہ تھا۔ اس معاملے میں سوشل میڈیا پر پھیلایا جانے والا بیانیہ محض غلط معلومات اور سیاسی پروپیگنڈے پر مبنی تھا۔